t Evengelie volgens Matteüs 05
01Dou e aal t volk zag, ging e op baarg. Noadat e zitten goan was, kwammen zien leerlingen bie hom.
02Hai nam t woord en leerde heur:
03"Zoaleg dij aarm van gaist binnen:
t hemels keunenkriek is heurent;
04zoaleg dij verdrait hebben:
zai zellen troost worden;
05zoaleg dij zaachtmoudeg binnen:
zai zellen eerde aarven;
06zoaleg dij honger en dörst noar gerechteghaid hebben:
zai zellen zat genog kriegen;
07zoaleg dij omdenken hebben:
mensken zellen ook omdenken mit heur hebben;
08zoaleg dij zuver van haart binnen:
zai zellen God zain;
09zoaleg vredestichters:
zai zellen kinder van God nuimd worden;
10 zoaleg dij achterheer zeten worden om gerechteghaid:
t hemels keunenkriek is heurent.
11 Zoaleg bin iezulm, as ze joe oetschelden, op hoed zitten en joe op alderhande menaaiers belastern, om mie.
12 Wees ter deurhèn blied om en zing der op lös. In hemel wacht joe n riek loon. Zo hebben zai ja achter profeten véúr joe heer zeten.
13 Ie binnen t zolt veur eerde. Mor as t zolt ook laf wordt, hou zel dat ooit weer goud kommen? t Is ja naargens meer veur te bruken. Kinnen t allenneg mor votsmieten en deur mensken vertrappen loaten.
14 Ie binnen t licht veur wereld. n Stad boven op n baarg kin nait bezied blieven.
15 Ook steken mensken gain laamp aan en zetten dij onder spintvat. Nee, ze zetten hom op stander. Den geft e licht veur altmoal dij in hoes binnen.
16 Zo mout ie ook licht geven veur mensken. Den kinnen ze joen goie doaden zain en zellen ze joen Voader in hemel eer bewiezen.
17 Denk mor nait dat ik kommen bin om Wet en Profeten òf te schavven. Nee, ik bin nait kommen om òf te schavven mor òf te moaken.
18 Wis en woarachteg: veurdat t mit hemel en eerde gebeurd is, zel der gain stip of streepke van wet ofgoan. Eerst mout ales verbie wezen.
19 Dij ain van minste veurschriften ofschaft en mensken zó leert dij zel in t hemels keunenkriek nait in tel wezen. Mor dij ze dut en leert dij zel n grode noam hebben in t hemels keunenkriek.
20 Joa wis, dat zeg ik joe: as t mit joen gerechteghaid nait beter staait as mit Farizeeërs en schriftgeleerden heurent, denk den mor nait dat ie in t hemels keunenkriek kommen.
21 Ie hebben heurd dat tegen joen veurolden zegd is: 'Ie maggen gainent doodsloagen. Wèl of ain doodslagt, heurt veur t gerecht.'
22 Mor ik zeg joe: wèl vergrèld is op zien bruier heurt veur t gerecht. Wèl n aander oetmoakt veur 'stovvel' heurt veur Hoge Road. En wèl zegt: 'Doe bist gek' heurt in t hellevuur.
23 As ie joen goave noar t altoar brengen en t komt joe in t zin dat joen bruier wat tegen joe het,
24 loat joen goave doar den veur t altoar liggen. Goa hèn, moak t eerst goud mit joen bruier en ovver den joen goave.
25 Ie mouten goud akkedaaiern mit joen tegenstander. Gaauw, in tied dat ie nog mit hom onderwegens binnen! Zodat tegenstander joe nait veur rechter sleept en rechter joe aan plietsie oetlevert en ie in t gevang stopt worden.
26 Ik verzeker joe: ie zellen doar vervaast nait oetkommen veur en aleer ie ales betoald hebben. Tot aan leste sènt tou!
27 Ie hebben heurd dat ter zegd is: 'Ie zellen nait ontraauw wezen.'
28 Mor ik zeg joe: elkenain dij noar n aander zien vraauw kikt en slim begereg noar heur is, dij het in zien haart al mit heur ontraauw west.
29 As joen rechteroog joe stroekeln dut, rop hom der den oet en smiet hom vot. t Is ja beter veur joe dat ain van joen ledemoaten verloren gaait as dat ie mit n geef liggoam in hel smeten worden.
30 As joen rechterhaand joe stroekeln dut, haauw hom der den òf en smiet hom vot. t Is ja beter veur joe dat ain van joen ledemoaten verloren gaait as dat ie mit n geef liggoam in hel te laande kommen.
31 Der is ook nog zegd: 'Elkenain dij zien vraauw votsturen wil, mout heur n schaaidensakte mitgeven.'
32 Mor ik zeg joe: elkenain dij zien vraauw votstuurt om aander reden as dat ze ontraauw is, dij moakt heur tou n traauwbreekster. Elkenain dij n vraauw traauwt dij votstuurd is, pleegt ook traauwbreuk.
33 Ie hebben ook heurd dat tegen joen veurolden zegd is: 'Ie mouten joen aid nait breken, mor veur de Heer joen aiden holden.'
34 Mor ik zeg joe: dou haildaal gain aid. Bie hemel nait: dat is ja God zien troon.
35 Bie eerde nait: dat is ja zien voutenbaank. Bie Jeruzalem nait: dat is grode keunenk zien stad.
36 Bie joen aigen kop ook nait: ie kinnen ja gain ain hoarke wit of swaart worden loaten.
37 Mor: joen joa mout joa wezen, joen nee, nee. Wat doar nog bie komt, deugt nait.
38 Ie hebben heurd dat ter zegd is: 'n Oog veur n oog en n taand veur n taand.'
39 Mor ik zeg joe: weer joe nait tegen wèl joe dwaarszit. As ain joe n slag op aine waang verkocht, draai hom aander den ook tou.
40 As ain joe n perses aandut en as onderpaand joen hemd hebben wil, geef hom joen jak den ook.
41 As ain of aander joe der tou dwingt n kilometer zien pakkeloazie te droagen, loop den twij kilometer mit hom mit.
42 As ain joe wat vragt, geef hom dat. Wil ain wat van joe lainen, draai joe der den nait veur vot.
43 Ie hebben heurd dat ter zegd is: 'Ie mouten joen noaste laifhebben en joen vijand hoaten.'
44 Mor ik zeg joe: hol van joen vijanden en beed veur wèl joe achternoazitten.
45 Allenneg zó kin ie kinder wezen van joen Voader in hemel. Hai moakt ja dat zun opgaait over minne en goie lu, en dat t regent over deugdzoamen en deugennaiten.
46 As ie bloots holden van ain dij jóe geern mag, wat veur loon kin ie doarvan verwachten wezen? Dat doun tolboazen ook ja!
47 As ie bloots joen bruiers en zusters goidagzeggen, wat veur biezunders doun ie den? Doun haaidens dat nait krekt zo?
48 Ie mouten den aal volmoakt wezen, krekt as joen Voader in hemel volmoakt is.
|
